Во текстот од владината Уредба за прогласување енергетска криза има голема грешка токму во делот со кој се регулираат ограничувањата односно рестрикциите, објави телевизија Телма.

Во членот 7, кој ги регулира мерките кои се преземаат во став 1 алинеја (2) стои: ограничување на потрошувачка на електрична енергија во согласност со член 10 од оваа уредба.

Меѓутоа, во посочениот член 10 всушност нема никакво објаснување, а тој е само завршна одредба со која се укинува претходната Уредба од 2012-та година.

Првичното објаснување од надлежните е дека најверојатно станува збор за грешка, која ќе биде проверена.

Од друга страна, ограничувањата се регулирани во членот 9, па може и да се претпостави дека станува збор за техничка грешка иако тоа значи дека ќе треба исправка во електронската верзија на Службен весник, пишува Телма.