Грчките власти забранија каков било транспорт на кози и овци низ земјата за да се спречи заразната и смртоносна болест ППР, попозната како „козја чума“. Болеста е смртоносна за 80 до 100 отсто од заразените грла, но не е опасна за човекот.

– Движењето на овци и кози заради расплод, товење и колење е забрането низ цела Грција, со цел да се ограничи ширењето на болеста и да се искорени – објави Министерството за земјоделство.

Издвоени се две жаришта на заразата – во централниот регион Лариса и на Коринт на југ. Надлежните власти спроведуваат истрага како се појавил вирусот, со особено внимание на „сомнителниот увоз“ на добиток. Козјата чума првпат е забележана во Кот Дивоар во Африка во 1942 година и веќе е проширена низ целиот свет.

За новите мерки се известени сите сточари, кланици и производители на сирење, а се разменуваат информации со партнерите од Европската Унија. Правилата на ЕУ налагаат да се уништат целите стада во трлата каде што ќе биде откриен макар еден случај. Откако во Грција е откриен првиот случај на 11 јули, уништени се 7.000 грла добиток.

Грција е земја со најголем број кози во ЕУ, а од козјо и овчо млеко се прави типичното сирење фета.