Пожарот кај селото Николиќ во општина Дојран, активен веќе трет ден, ја помина границата и за прошири и на грчка страна, а интервенираат копнени и воздушни противпожарни сили на соседната земја, јави дописничката на МИА од Атина.

Како што информираат од противпожарната служба на Грција, пожарот е во регионот на Дојранското Езеро кај Кукуш, а се гасне со 60 пожарникари со три пешадиски тима, 17 возила, два авиони и еден хеликоптер, при што помагаат и цистерни и возила од општината.

За конкретниот пожар кај Дојран, Грција испрати два противпожарни авиони од типот канадер CL-415 и две противпожарни возила со осум пожарникари, по билатералното барање за помош упатено од ЦУК до Единствениот координативен центар за операции и управување со кризи на Грција.

Попладнево во 18:00 часот по локално време двата канадери полетаа од Солун, а копнените сили што беа испратени веќе интервенираат. Ѓ

Во меѓувреме, „Ер тракторот“ на Дирекцијата за заштита и спасување дејствува во Крива Паланка, додека хеликоптерот на Министерството за внатрешни работи е упатен кон селото Орман во скопската општина Ѓорче Петров, информираа надлежните.

Армијата, со ангажман на вкупно 157 припадници, активно учествува во гаснењето на повеќе позиции. Приоритет е пожарот кај касарната Ѓорче Петров, каде што се ангажирани 60 луѓе. Во селото Николиќ се распоредени 60 припадници на армијата, во Крива Паланка дејствуваат триесетина војници, а една екипа од АБХО е ангажирана на пожарот во Визбегово, соопштија пред малку од ЦУК.