Во едната од двете компании за наплата на долгови – „Еос матрикс“ чекаат за наплата околу 50 милиони евра од 55.000 граѓани, главно корисници на банкарски кредити, а од банките се преземени и побарувања од фирми во вредност од околу 1 милион евра. Генералната директорка на „ЕОС матрикс“, Катерина Бошевска вели дека короната и „локдауните“ го направија своето и дека тоа особено се гледа кај мали фирми кои земале кредити да го преживеат периодот, но сега им оди тешко враќањето. Нејзиниот совет е да се направи сѐ што е можно за реструктуирањето на фирмата, пред да почне процесот на стечај и ликвидација.

– Се насочивме кон тоа во идниот период повеќе да работиме со фирмите што имаат долгови кон банките, така ќе им помогнеме и на нив, а и на стопанството. Кога земаат кредити тие се високо обезбедени, а доколку влезат во нефункционални побарувања, банките со одреден дисконт може и да ни ги отстапат. Ако е веќе почнат процесот на стечај и ликвидација, тогаш е доцна за тие фирми, вредноста се губи. Но ако се алармира порано дека имаат проблеми со враќање на долговите тогаш може да понудиме решенија како затворање на долгот со поповолни услови, или на пример, инвестирање во нив, ако оцениме дека со своето работење тие ќе може да ни ги вратат парите – вели Бошевска.

Според податоците, околу 90 отсто од нефункционалните банкарски пласамни се во фирмите. Бошевска потенцираше дека граѓаните се многу поодговорни кон обвсрските во однос на фирмите.

– Да, ние сме тие што ја имаме неблагодарната улога да им се јавуваме на граѓаните за заостанати долгови, место банките со кои имаме склучено договори. Но, ние им нудиме и решенија како да се затвори тој долг. Нашите граѓани се одговорни кон обврските. Дел од должниците веќе и заминале во странство, но нашето искуство е дека штом таму почнат со работа, доаѓаат и си ги расчистуваат долговите – објаснува Бошевска.

Таа вели дека компанијата го има имплементирано највисокиот стандард во однсос на доверливост на податоци, и дека списоците се исчистени, па не може да се протне некој телефонски број кој не бил оставен во банките за контакт.