Граѓаните од Ново Лисиче и Аеродром утрово по 27-ти пат ја блокираа крстосницата кај мостот „Киро Глигоров“, барајќи од надлежните конечно да го решат проблемот со депонијата Вардариште. Иако уредно поканети, ниту една институција не испрати претставници.

На собирот се појави единствено в.д. градоначалникот на Општина Аеродром и кандидат за градоначалник од ВМРО-ДПМНЕ, Дејан Митески. Тој вети поддршка и најави мерки за отстранување на кабастиот отпад и контрола од МВР, но неговиот одговор не ги задоволи граѓаните.

Од иницијативата „Стоп за Вардариште“ реагираа дека партиските разлики не смеат да бидат пречка за решавање на овој сериозен проблем. Тие нагласија дека депонијата останува без ограда, со отпад и недоволно обезбедување, а институциите немаат понудено никакви конкретни решенија.

За вечерва во 18 часот е најавен нов протест, а организаторите предупредуваат дека ако нема институционален одговор, блокадите ќе продолжат и ќе се засилат.