Армијата ужива најголема доверба од граѓаните, а полицијата, заедно со верските заедници го дели второто место, а нивниот низок процент (43 отсто) укажува на сѐ уште незадоволителна доверба на граѓаните кон овие институции. Токму довербата кон полицијата е драстично попозитивно перципирана во однос судството и обвинителството кои остануваат најнегативно оценети институции. Жителите во Северозападниот регион имаат голема, а во Источниот регион помала доверба во полицијата, покажа истражувањето на Евротинк-Центар за европски стретегии.

Александар Стојановски, постар истражувач, вели дека нивните истражувања покажуваат дека на државно ниво, 40 отсто од илјада испитаници изразиле недоверба во полицијата, 25 отсто имаат доверба, додека неутралните се над 33 отсто. Како да се подобри јавното мислење за транспарентноста и отчетноста на полицијата, е тема на проектот за инклузивна полиција на Евротинк центарот за европски стратегии.

– Спроведовме телефонска анкета кон крајот на минатата година, а сега ги презентираме резултатите од Источно планскиот регион споредбено со резултатите на држава. Многу слични се наодите. Имаме помал процент на неутрални граѓани во однос на тоа дали полицијата е транспарентна. Значи овде повеќе луѓе споредбено со националниот примерок сметаат дека полицијата е транспарентна, односно повеќе луѓе веруваат во нејзината отчетност, вели Стојановски.

Тој посочи дека истражувањето покажало дека граѓаните бараат реонски полицајци и позорникари низ своите населби.

Граѓаните, генерално, се чувствуваат безбедно, особено кога станува збор за нивната непосредна средина, односно населбата и градот-селото во кои живеат. Сепак, нивните главни грижи произлегуваат од егзистенцијални прашања, како економската сигурност, здравството/Ковид 19 и политичката нестабилност. Поголем е процентот на граѓани што имаат позитивна перцепција за професионалноста на полицијата, отколку оние што имаат негативна. Сепак, преовладуваат негативните перцепции за транспарентноста на полицијата, додека, истовремено, граѓаните се согласуваат дека полицијата е зависна од партиските, владините и од бизнис-интересите.

Перцепциите за полицијата се попозитивни кај етничките Албанци отколку кај етничките Македонци, што ги руши стереотипите за ниската доверба на етничките Албанци во оваа институција. И покрај тековните реформи, кои треба да ја осигураат приватноста на граѓаните и да влеат чувство на сигурност, а кои се значајни особено поради темелно нарушената доверба кон безбедносниот систем во текот на политичката криза од 2015-2016 година, половина од испитаниците сметаат дека тајните служби ги прислушуваат противниците.

Пендаровски по повод 7 Мај: Довербата на граѓаните во државата, претставува доверба во нејзините институции