Сите граѓани кои секојдневно ги паркираат своите возила во катната гаража „Беко“, без оглед дали станува збор за физички лица или вработени во фирми, најдоцна до 11 јули треба да ги ажурираат податоците во договорите за услуги, склучени со ЈП „Градски паркинг“. Доколку тоа не го сторат навреме, од претпријатието предупредуваат дека ќе им бидат исклучени картичките за влез и излез од гаражата.

Оттаму објаснуваат дека секој корисник треба да ги достави потребните документи за ажурирање на податоците согласно Договорот за услуга во канцеларијата во Центар, лоцирана на улица Ѓуро Стругар 15а, секој работен ден, од понеделник до петок, во периодот од 8 до 15.30 часот.

Ги повикуваме сите корисници навремено да ги достават своите документи во предвидениот рок. Во спротивно, ќе сметаме дека не се заинтересирани за користење на услугите, по што ќе се пристапи кон исклучување на картичките за влез и излез од катната гаража – велат од „Градски паркинг“.

Од претпријатието информираат и дека во текот на летото скратено е работното време на канцеларијата за односи со корисниците во Аеродром, односно до први септември таа ќе работи само во една смена.

Ги известуваме корисниците на нашите услуги дека поради користење на летните одмори на вработените во ЈП „Градски паркинг“, канцеларијата за односи со корисници лоцирана во зградата на Рударски институт, општина Аеродром, во периодот од 1.7.2025 – 1.9.2025 ќе работи во една смена и тоа од понеделник до петок од 8 – 16 часот – соопштија од Јавното претпријатие.