Високите температури кои во изминатиот период ја зафатија земјава, драстично ја зголемија потрошувачката на пивка вода во главниот град. Скопјани водата, освен за задоволување на физиолошките и хигиенските потреби, се почесто ја користат и за наводнување на дворовите и бавчите.

За да се задоволи потребата за дополнителни количини вода, несовесни граѓани се решаваат наместо од чешма, од каде што потрошената вода мора да ја платат, да постават диви приклучоци и на тој начин да користат вода што нема да ја платат. Со тоа прават штета на целокупната водоводна мрежа, а притоа го кршат и Законот за  водоснабдување.

Со цел да се намали кражбата на чистата вода за пиење, од ЈП „Водовод и канализација“ континуирано спроведуваат акции за пронаоѓање, а потоа и за исклучување на диво поставените приклучоци на водоводната мрежа.

Последната акција за отстранување на диви приклучоци, која била реализирана од страна на екипите на ЈП „Водовод и канализација“  се одвивала во населените места  Долна Матка, село Крушопек и Сарај.

– Дивите приклучоци се забранети со закон (Закон за водоснабдување, член 23) и се утврдуваат од страна на овластен комунален инспектор на општината и на Градот (Закон за водоснабдување, член 37), врз основа на што за сите утврдени иматели на див приклучок ќе биде поткрена прекршочна постапка за сторено кривично дело – посочуваат од јавното водоводно претпријатие.

Од претпријатието укажуваат и дека со дивите приклучоци се нанесува директна штета на системот за водоснабдување и на квалитетот на водоснабдувањето до сите корисници во град Скопје.

– ЈП „Водовод и канализација“  ги повикува граѓаните на одговорно однесување и регуларно поднесување на барања за водоводен приклучок доколку за тоа имаат потреба. Апелираме до граѓаните на град Скопје, доколку забележат див приклучок, да го пријават на 023073 010, [email protected], www.vodovod-skopje.com.mk или преку мобилната апликација достапна за Андроид и ИОС – апелираат од ова јавно претпријатие.

За потсетување, деновиве од „Водовод и канализација“ излегоа и со апел до скопјани за рационално и внимателно да ја користат водата за пиење, особено во деновите со екстремно високи температури и особено да се избегнува непотребно трошење на водата за полевање бавчи и ниви.

– Апелираме до граѓаните на градот Скопје за рационално користење и употреба на водата, односно да се избегнува полевање поголеми површини и непотребно трошење на водата за време на топлите денови – велат од ЈП „Водовод и канализација“ .

Сепак, за разлика од многу земји, кај нас водата која е бактериолошки исправна освен за пиење се користи и за наводнување на јавното градски зеленило. Поголемиот дел од зелените површини на територија на Скопје се наводнуваат со вода од градскиот водовод. Исклучок од тоа е зеленилото и останатата вегетација во Градски парк, кои се наводнуваат со техничка вода, а со иста таква вода се наводнуваат и зелените површини во парковите во Општина Аеродром.