Засега се чувствувам добро. Имам само покачена температура и болки во мускулите и чувствувам изнемоштеност, порача прилепскиот градоначалник Илија Јованоски, кој синоќа го добил позитивниот тест на коронавирусот и се наоѓа во домашна изолација.

– Имав температура од 37,2 степени. Се посомневав на симптоми, иако немав загубен вкус и мирис. Тестот покажа дека сум позитивен, најверојатно вирусот сум го добил по контакт со позитивен зашто изминатите денови имавме некои состаноци. Сега температурата е 37,6, нема некои проблеми, примам терапија и сум во домашна атмосфера, вели Јованоски.

Јованоски, кој е специјалист-ортопед по професија и кој во време на пикот на пандемијата во октомври и ноември во минатата година волонтираше во приемниот оддел на инфективното одделение, апелира на почитување на заштитните мерки. Особено да нема собирања на младите и по кафулињата.

– Апелирам да се почитуваат сите заштитни мерки. Особено тоа да биде меѓу младите, да не се групираат, да не заседнуваат во кафулињата. Зголемениот број на новозаразени во Прилеп е главно поради непочитување на мерките и новите бројки се последица, во голем дел, поради собирањата за празникот „Свети Трифун”. Факт е дека новиот британски сој побрзо се шири и уште поголема опомена е да нема групирања и да се почитуваат мерките, порачува прилепскиот градоначалник Илија Јованоски кој е во домашна изолација, од синоќа позитивен на коронавирусот.