Музичарот Горан Бреговиќ е ставен на листата на непожелни лица во Латвија, изјави на 29 април министерот за внатрешни работи Рихардс Козловскис за државната телевизија, а неговите концерти во таа земја планирани за ова лето ќе мора да бидат откажани. Заедно со Бреговиќ, на листата е ставена и руско-литванската пејачка Кристина Орбакаите.

Како што пренесува литванскиот портал ЛСМ+, оваа одлука ја донел министерот за внатрешни работи.

Музичарите се ставени на црната листа по препорака на Службата за државна безбедност (ВДД), објасни министерот за внатрешни работи.

„Клучната причина е поддршката на агресијата против Украина и учеството во јавни настани на окупираните територии. Ние како Латвија ја поддржуваме Украина и ќе продолжиме да го правиме тоа, така што ова за нас во овој случај е дефинитивно неприфатливо“, рекол министерот.

Според информациите достапни за ВДД, Бреговиќ од 2014 година неколкупати се појавил на Крим, кој беше анектиран од Русија. Според нив, музичарот исто така честопати јавно ја изразувал својата поддршка за Русија, ширејќи дискредитирачки пораки против западните земји. Орбакаите, исто така, настапувала на Крим по окупацијата и учествувала во разни руски пропагандни настани, пишува РСЕ.

„Според проценката на ВДД, настапот на лица кои ја поддржуваат руската агресија во Латвија не е во интерес на националната безбедност на нашата земја, бидејќи може да поттикне меѓуетнички тензии во општеството“, се наведува во пишаниот коментар на ВДД, пренесе националната телевизија.

И Бреговиќ и Орбакаите требаше да настапат во Латвија ова лето, а билетите се веќе во продажба. Концертите сега веројатно ќе бидат откажани.

ВДД и Министерството за внатрешни работи ги повикуваат организаторите на настаните внимателно да ги проценат гостувачките уметници – ако некое лице настапува во Русија или на нејзините окупирани територии во Украина, тоа се смета за поддршка на руската агресија и на воените злосторства.

Минатата година, 480 странци беа додадени на црната листа по препорака на разни безбедносни служби.

Руски тајкун му нуди 3,5 милиони евра на Брега за вилата во Црна Гора, тој не сака ни да чуе!