Еврокомесарката за проширување Марта Кос денеска во Љубљана разговараше со словенечкиот премиер Роберт Голоб, кој посочи дека Европската унија сега има историска шанса и обврска да ги отвори вратите за сите земји кандидати кои со децении ја чекаат таа можност.

Кос посочи дека за прв пат по десет години постои реална шанса барем една, а можеби и две или три земји да стигнат до крајот на преговарачкиот процес за прием во ЕУ.

„Во последните 12 години не бевме особено успешни во преговорите бидејќи тоа не беше приоритет. Во изминатите 12 години затворивме осум поглавја од преговорите, од кои три минатата недела“, додаде таа.

Според Кос, ставот кон проширувањето во моментов е многу позитивен во Брисел. Таа смета дека повеќе од 100 преговарачки поглавја со различни земји кандидати би можеле да бидат затворени за време на нејзиниот мандат.

„Во оваа смисла очекувам и поддршка од сите земји членки“, рече Кос, посочувајќи дека и Словенија силно го поддржува процесот на проширување.

Во исто време, таа ја нагласи потребата ЕУ да преземе сопствени реформи за да се осигура дека е подготвена да ги пречека новите членки.