Дербито на стартот од новата сезона во Премиер лигата донесе триумф за Арсенал на „Олд Трафорд“, каде „топчиите“ славеа над Манчестер јунајтед со 1:0. Но, по натпреварот тема е и дебито на Виктор Ѓокереш во Премиер лигата кој не се прослави.

Швеѓанецот околу кого се крена голема прашинав во летниот преоден рок  го одигра својот прв официјален натпревар за лондонскиот клуб и во него ги разочара фановите на „топџиите“.

Ѓокереш на теренот мина 60 минути и според анализите, беше најслабо оценет играч на мечот. Платформата „Софаскор“ му даде оценка од 6.0, најниска меѓу сите 29 фудбалери што настапија. Без удар кон голот, само четири успешни додавања од девет обиди, изгубени 11 топки, еден обид за дриблинг кој бил неуспешен, еден добиен од шест воздушни дуели…

Најмногу разочара тоа што токму Ѓокереш беше дочекан како голема надеж во нападот, засилување што треба да внесе свежина и конкретност. Но, на „Олд Трафорд“ делуваше изолирано и останува да се види дали во следните натпревари ќе успее да ја покаже формата со која играше минатата сезон во Спортинг.

Во следното коло Арсенал на свој терен ќе се соочи со Лидс.