Ансу Фати (22) дебитираше за првиот тим на Барселона во 2019 година, станувајќи вториот најмлад дебитант во историјата на шпанскиот фудбалски клуб.

Во тоа време тој сѐ уште немаше настапувано за ниту една друга екипа, но веднаш беше префрлен од академијата во сениорскиот тим. Во првата сезона забележа 52 настапи, постигна 10 голови и забележа три асистенции.

На крајот на 2020 година, тој доживеа сериозна повреда на менискусот и паузираше девет месеци. Кога се врати, Барса веќе имаше нови решенија на својата позиција, а тој повторно не успеа да се наметне.

Во 2023 година замина на позајмица во Брајтон каде одигра 27 натпревари и имаше четири погодоци, а минатото лето се врати во Барса. Новиот тренер Ханси Флик му даде шанса, но Фати повторно се повреди и одигра само осум натпревари. Флик во неколку наврати го критикуваше поради недостатокот на напор на тренинзите.

Шпанските медиуми пренесуваат дека Фати ја завршил својата приказна во Барселона и покрај тоа што неговиот договор е до 2027 година. Новинарот Алфредо Мартинез објави дека негови опции за заминување се Саудиска Арабија или Катар, каде интерес покажуваат неколку клубови. Тој наводно веќе побарал од својот агент Жорге Мендеш да влезе во преговори.