Пред изрекувањето на пресудата за раперот и бизнисмен Шон Диди Комбс, една од жените што требаше да сведочи за обвинителството, идентификувана во судските документи како „Жртва 3“ или Вирџинија Хун „Џина“, објави писмо во кое се обидува да го поддржи Диди и да ги оспори обвинувањата на обвинителството.

Според „ТМЗ“, во писмото доставено до судот, Џина наведува дека соработувала со истражителите и ги доставила сите информации што ги побарале, вклучувајќи фотографии, текстуални пораки и видео материјали. Таа тврди дека била под притисок за време на процесот да биде „Жртва 3“, иако им кажала на истражителите дека не била измамена или вклучена во проституција со Диди или други.

– Дури и кога реков дека не сум жртва, обвинителите инсистираа да бидам една од нив – наведува Џина во писмото.

Таа додава дека доколку била повикана на суд, ќе сведочела и ќе ја презентирала својата верзија на настаните, но дека не била повикана.

Диди беше прогласен за виновен за транспорт со цел проституција во јули оваа година, а беше ослободен од обвинението за заговор за извршување рекет и две точки од обвинението за трговија со луѓе со цел сексуална експлоатација.

Адвокатите на Диди побараа ново судење или неговата пресуда да биде „поништена“, наведувајќи процедурални грешки и нефер околности за време на судењето. Судијата Субраманијан категорично ги отфрли овие аргументи во својата пресуда. Од друга страна, обвинителите бараат значителна затворска казна, предлагајќи минимум 11 години и три месеци затвор.

Одбраната на Диди, од друга страна, побара максимум 14 месеци затвор, земајќи го предвид времето што веќе го поминал во притвор, каде што Комбс е држен од септември 2024 година.

Пресудата е закажана за утре, 3 октомври.