Во дуелот со младиот англиски тенисер Џек Дрејпер, Новак Ѓоковиќ имаше проблеми само во првиот сет кој го загуби, но потоа рутински го совлада противникот со 4:6,6:1,6:2,6:2.
За време на првиот сет, бранителот на трофејот имаше проблеми со привикнување на новата подлога, неколку пати проклиза на тревата и тоа го наруши неговиот ритам на стартот. Тоа го искористи Дрејпер кој по 38 минути игра успеа да слави со 6:4.

Но, веќе од вториот сет Ѓоковиќ ја презеде доминацијата на теренот, ја врати сигурноста и самодовербата по што повеќе немаше закани од противникот. До крајот на мечот, Ѓоковиќ му дозволи на Дрејпер да освои само пет гемови за рутинска победа. Во второто коло, Ѓоковиќ го очекува подобриот од дуелот Кевин Андерсон и квалификантот Бариос.