Ѓоковиќ е единствен кој може да победи на сите четири грен слем турнири во една година
Поранешниот тенисер Матс Виландер во колумна за „Лекип“ го пофали Новак Ѓоковиќ кој вчера по втор пат триумфира на Ролан Гарос.
Ѓоковиќ во финалето против Стефанос Циципас губеше со 0:2 во сетови по што побара тајм-аут за да оди во тоалет и по враќањето тој беше сосема поинаков тенисер. Според поранешниот грен слем шампион, Ѓоковиќ ја повтори магијата од осминафиналниот дуел со Лоренцо Мусети против кого исто така губеше со 0:2 во сетови.
Препорачано
„Циципас го започна мечот како тој да беше шеф на теренот. Сепак, пресвртница во финалето беа почетните гемови во третиот сет. Се случи истото што и на дуелот со Лоренцо Мусети во завршницата од мечот, односно кога се врати од тоалет, Ѓоковиќ го смени начинот на игра. Ја промени стратегијата и почна да игра поризично и да наметне пократка размена на ударите. Така од просечните шест удари во првиот сет дојдовме до просечно четити во третиот и четвртиот сет. По два часа игра, Новак ја анализираше ситуацијата и понуди друга тактика и игра на Циципас. Како да му порача: Што ќе правиш сега? А, Циципас не можеше да направи ништо“, пишува Виландер за „Лекип“.
Поранешниот грен слем шампион понатаму анализира дека токму Новак Ѓоковиќ е единствениот кој може да го повтори успехот на Род Лејвер, да победи на сите четири грен слем турнири во една година.
– Мода да имате храброст да кажете „нема врска доколку загубам, дефинитивно мора да го сменам пристапот на игра“. Во последните три сета чувствувавме дека беше 100 проценти сигурен оти ја има вистинската стратегија. На крајот, Новак не изгледаше воопшто уморно за разлика од Циципас. Очигледно е дека Новак ќе биде голем фаворит на Вимблдон, посебно поради тоа што Федерер ќе биде две години постар од нивната финална пресметка. И така Новак Ѓоковиќ доаѓа во можност да го освои календарскиот грен слем, а тоа воопшто не ме изненадува. Секогаш мислев дека доколку некој може да го направи тоа, тогаш тоа е Новак. Тој е единствен кој може да доминира на сите четири грен слем подлоги. Всушност, единствена вистинска пречка за него беше Рафа Надал во Париз. Кога го помина него, ми се чини дека ја направи најтешката работа од задачата“, пишува Виландер.
