Бројот на мигранти и бегалци кои загинаа обидувајќи се да стигнат до Европа преку Медитеранот од почетокот на годината е двојно поголем отколку во првата половина на 2020 година, соопшти Меѓународната организација за миграција (ИОМ).

Според податоци на агенцијата на Обединети нации, од јануари до јуни 2021 година исчезнаа најмалку 1.146 лица кои се обиделе да го преминат Средоземното Море.

Во исто време, за 56 проценти е зголемен бројот на мигранти кои преку морски пат се упатиле кон Европа во однос на првите шест месеци од 2020 година.

Според ИОМ најсмртоносна била централно-медитеранската рута, од брегот на Либија до Италија, при што загинале  741 лице во обид да стигнат до Европа.

На второ место по опасност е рутата преку Атлантски Океан од Западна Африка до Канарски Острови, кој однесе најмалку 250 животи.

Најмалку 149 лица загинаа на западниот медитерански пат од Северна Африка до Шпанија, и уште најмалку шест на истокот на Медитеранот, во обид да стигнат до Грција.

ИОМ нагласи дека реалниот број на загинати мигранти најверојатно е многу поголем, бидејќи многу бродоломи воопшто не се регистрирани, а некои се многу тешки за проверка.

Најсмртоносната поморска несреќа годинава се случи на 22 април во близина на брегот на Либија, кога и покрај повиците за помош се удавија 130 луѓе.