И ден денес народите се борат за да докажат чиј е Тесла. Дали е од Хрватска или е Србин, или е можеби Американец. Веројатно, од се тоа по малку. Роден е во Хрватска во српско семејство, а животот го минал во Америка. Неговите изуми и денес привлекуваат огромно внимание.

Тесла е по потекло Србин, роден на 10 јули 1856 година во Смилјан, место кое припаѓало на тогашното Австроунгарско царство, а денес е на територија на Хрватска. Студирал електотехника во Грац и во Прага. Во 1884 година, заминал во САД каде кратко соработувал со Томас Едисон пред патиштата да им се разидат.

Неколку патентирани изуми му продал на Џорџ Вестингхаус, американски претприемач, изумител и инженер. Изумите му донеле голема сума пари, а најголем дел од оваа сума ја искористил за финансирање на сопствените успешни, но и на неуспешните, проекти. Во 1895 година, Тесла и Вестингхаус на Нијагарините водопади ја изградиле првата хидроелектрана во светот.

На почетокот на 20.век Тесла отворил лабораторија под името Ворденклиф на Лонг Ајланд и таму ги спроведувал некои од своите најамбициозни експерименти.

Починал на 7 јануари 1943 година во Њујорк кадешто живеел речиси 60 години. Но неговите изуми живеат со нас и денес.

За животот на Тесла и славните негови дела постојат голем број на книги и филмови. Кристофер Нолан, исто така, направил филм за Никола Тесла под името Престиж, а во 1994 година во Њујорк, аголот на 40. улица и 6-та авенија, каде што се наоѓала лаборатоијата на Тесла, го добил името Агол на Никола Тесла.

Занимливости за Никола Тесла

Од една страна Тесла бил многу успешен изумител, а од друга страна покажувал асоцијални однесувања и немал ниедна забележлива љубовна врска. Својот живот го завршил сиромав и сам. Со текот на годините покажувал се поексцентрична природа, и бил некој вид на „луд научник“.

Многу се грижел за животната средина. Според зборовите на Џејн Алкорн, професор во пензија и претседател на Научниот центар на Тесла во Ворденклиф, Тесла бил многу загрижен поради фактот дека луѓето пребргу ги трошат природните богатства на планетата Земја. Ги истражувал начините на кои може да се прошири природната енергија на земјата и небото. Создал вештачко осветлување во својата лабораторија и ги испитувал можните разлики на електричната енергија на Земјата и на високите објекти.

Починал како хуманитарец без скршен денар. –Паричната добивка никогаш не го интересирала, а лошата страна на тоа била што никогаш немал доволно пари за да го направи тоа што го сака, објаснува Алкорн. Меѓу пријателите имал познати личности како што е писателот Марк Твен и француската актерка Сара Бернар, но финансиски не стоел добро. Едисон и Вестингхаус финансиски биле многу поуспешни.

Ретко спиел и имал опсесивно-компулсивно пореметување. Тврдел дека му требаат само два часа сон во текот на ноќта, иако повремено дремнувал преку ден. Се згрозувал од накит и од кружни предмети, косата никогаш не си ја допирал, бил опседнат со бројот 3, а садовите за јадење пред да ги употреби ги гланцал до совршенство употребувајќи 18 салфети.

Ги предвидел денешните паметни телефони и тоа во 1909 година! Обидувајќи се својата идеја за малиот апарат кој би примал телеграми и шифрирани пораки да ја спроведе во дело, Тесла го прокетирал првиот преносен систем подигнувајќи го на Лонг Ајланд. Основната намена на системот била безжична врска преку Атлантскиот океан, но овој систем никогаш не бил функционален, па затоа и бил урнат во 1917 година.

Имал фотографско памтење. Имал способност да чита книги и списанија и истовремено да ги запомни. Сите податоци кои би ги прочитал ги користел како во себе да има библиотека која му е секогаш на располагање. Како резултат на тоа, Тесла ретко правел цртежи на своите изуми, туку работел според сликите во својата глава.

Бисерите го излудувале. Тесла не можел да ги поднесе бисерите, буквално го излудувале. Толку не ги поднесувал што одбивал да разговара со жени кои носеле бисери. Во една пригода, кога неговата секретарка ставила бисерен накит, ѝ дал слободен ден. Исто така имал истенчен вкус за стил и естетика и сметал дека ако човек сака да биде успешен, мора да изгледа успешно. Секоја вечер за време на вечерата носел бели ракавици и бил горд на своето кицошко облекување.