Двете претстави на култното шоу „Глумците пеат“ што требаше да се одржат на 8 и 9 април во МНТ, се презакажани за 8 и 9 јуни во истиот театар.

Одложувањето е поради трагедијата во Кочани, и како што наведуваат од продукцијата, во овие моменти не е време за радост и песна. Тие во трагедијата изгубија член од тимот, односно придружниот вокал Сара Пројковска, додека вториот придружен вокал, Ана Костадиновска, е повредена.

– Трагедијата сите нè погоди и од почит кон жртвите и повредените, но и кон целата нација што тагува, одлучивме да го одложиме шоуто. Сцената е место за радост, смеа и песна, а нам во овој период навистина не ни е до тоа. Се надеваме дека нашата верна публика ќе има разбирање за оваа одлука – изјавија организаторите.

Инаку, за сите што нема да бидат во можност да присуствуваат на новите термини, можна е рефундација на влезниците и тоа на продажните места каде што се купени, во периодот од 28 март до 10 април. За МНТ ќе треба да се обратат на билетарницата на МНТ, а за Мктикетс треба да се испрати барање на [email protected] за рефундација.

Првата претстава za 8 јуни е распродадена, додека за втората на 9 јуни има сѐ уште карти онлајн на платформата www.mktickets.mk.

Режисер на шоуто и годинава е Дејан Пројковски, а диригент на биг-бендот е Љупчо Мирковски. Новите аранжмани на песните се на Бобан Мирковски, кореографијата на Олга Панго, а костимографијата на Марија Пупучевска.

„Глумците пеат“, чиј идеен творец е актерот Марин Бабиќ, кој почина во 2022 година, за првпат било организирано во 1992 година, во чест на Светскиот ден на театарот и се организирало сè до 2006 година. По неговата смрт, неговите ќерки Маја и Ира Бабиќ, по 17 години пауза повторно го враќаат на сцената.