Отсекогаш сме биле на ставот дека секоја земја која е кандидат за членство во ЕУ мора да има свои заслуги за учеството во  Унијата, како и да ги почитува сите права и одговорности што ги презела во процесот. Значи ние сме жестоки поддржувачи на проширувањето на ЕУ, но се придржуваме на општи услови и процедура која им е позната на сите, изјави бугарскиот премиер Димитар Главчев во Берлин, каде што учествуваше на Самитот во рамките на „Берлинскиот процес“.

Бугарскиот премиер истакна дека во однос на билатералните средби, во текот на процесот е предложено проширување на преговорите на ниво на земја кандидат – членка – ЕУ, за да се избегнат контрадикторности меѓу двете земји.

– На крајот на краиштата, ова го направивме со Република Северна Македонија и очигледно одиме напред, како што беше даден добар пример на средбата, една земја да преговара со целата Европска Унија – нагласи Главчев.

Тој коментираше дека на средбата станало јасно дека Црна Гора ќе ги затвори преговарачките поглавја до крајот на годината и дека се очекува Албанија да почне да ги отвора преговарачките поглавја во овој период и дека се надевале дека Србија може да отвора преговарачки поглавја на почетокот на 2025 година.

– Во однос на Зелената програма, во која учествуваме, ја истакнав особено важната улога за нас на Коридорот 8, кој ги поврзува Италија, Албанија, Северна Македонија и Бугарија во правец запад-исток. Пристигнувајќи до Варна и Бургас, коридорот ќе овозможи и пристап до оската север-југ од Грција до Романија, која има дури и глобална димензија. Ја истакнавме важноста на овој коридор – додаде премиерот.

Бугарскиот премиер имаше говор на вториот панел на форумот на тема „Зелена агенда, поврзаност, енергија“ при што го истакна развојот на транспортните коридори, како што е Трансевропската транспортна мрежа (TEN-T), која ќе ги намали трговските бариери и ќе ја подобри мобилноста во регионот. Главчев ја истакна и енергетската поврзаност, како и инвестициите во енергетската инфраструктура и обновливите извори. Тие се од витално значење за намалување на зависноста од фосилни горива и усогласување со Зелената агенда за Западен Балкан.

Берлинскиот процес е воспоставен во 2014 година како платформа за зајакнување на соработката меѓу земјите од Западен Балкан и земјите домаќини на Берлинскиот процес, како и ЕУ.