Здружението „Гласен Текстилец“ ги повика граѓаните да го поддржат бојкотот на маркетите овој петок на 31 јануари. Одтаму нагласуваат дека како организација немаат ништо против вработените во маркетите, туку се против високите цени кои не опкружуваат.

– Неприфатливо е лебот да чини речиси едно евро. Неприфатливи се овие високи цени во услови на ниски примања. Време е да застанеме и да поставиме црвена линија против постојаните и радикални поскапувања на секојдневните трошоци. Апелираме да не се прават залихи од намирници пред бојкотот. Не купувајте преголеми количини во четврток – само така бојкотот ќе има вистински ефект – порачаа од „Гласен Текстилец“.

Тие како позитивен пример го издвојуваат искуството од Хрватска, каде граѓаните организираа масовен протест, изразувајќи незадоволство од високите трошоци за живот.

– Резултатот беше намалување на продажбата во маркетите за 50 отсто во еден ден. Оваа акција ги инспирираше соседните земји да преземат слични чекори, а дел од продуктите добија намалување на цените дури до 50 отсто. Ова е повеќе од важно! За нас се работи – порачаа од ГТ.