Експедицијата на кошаркарскиот клуб МЗТ Скопје вечерва ќе го одработи претпоследниот тренинг пред стартот на завршниот турнир од Купот на Македонија во Гевгелија, каде што во утрешното четврт-финале ќе ги одмери силите со големиот ривал, Работнички (20.30 часот).

Денешната прес-конференција пред спектаклот донесе размислувања од сите актери, меѓу кои имаше и такви што може да се сфатат како провокативни, но и измислени, информираат од актуелниот македонски шампион.

Тоа пред сѐ се однесува на тврдењето на еден од тренерите на учесниците, кој наводно го „посакувал МЗТ во финалето“, поради наводен “приватен облог“ со директорот на МЗТ, што не само што не е точно туку е и ноторна лага.

– Од страв се измислуваат работи и се кажуваат невистини за некакви си меѓусебни облози, од кои не само што сме изненадени туку сме и шокирани. Јас не сум човек што не се наоѓа во такви дејствија и навистина сум изненаден од потребата да бидам вмешан во една ваква приказна. На сето ова гледам како невкусна шега и провокација, кажани без да се размисли не само на мојата репутација, туку и на дигнитетот на функцијата што ја имам, со оглед што МЗТ е доминантен предводник на макбаскетот, кој треба да биде пример на секое поле. Нашите размислувања се само на теренот, од натпревар во натпревар, со цел сите да го дадеме својот максимум за да дојдеме до посакуваната цел, а тоа е 13-ти пехар во Купот за огромна радост на цел Аеродром – изјави извршниот директор на МЗТ, Филип Ѓоревски.