Првиот тенисер на АТП ранг листата, Новак Ѓоковиќ обезбеди пласман во полуфиналето на турнирот што се игра во Белград, Србија Опен. Ѓоковиќ во четвртфиналето со пресврт го елиминира сонародникот Миомир Кецмановиќ со 2:1 во сетови и тоа со 4:6,6:3,6:3.

Во првиот сет одлучувачкиот момент се случи во третиот гем кога Кецмановиќ направи брејк и предноста со сигурен сервис ја задржа до крајот на сетот.

Во вториот сет, Ѓоковиќ повторно во третиот гем го загуби сервисот, но овој пат експресно возврати и во наредниот гем направи рибрејк, потоа во осмиот гем направи уште еден брејк со што успеа да израмни на 1:1 во сетови.

Најдобриот светски тенисер не дозволи изненадување во одлучувачкиот сет и со два брејка дојде до победа која го однесе во полуфиналето.

Противник на Ѓоковиќ во полуфиналето ќе му биде подобриот од мечот помеѓу Карен Качанов – Тијаго Монтеиро.