Новак Ѓоковиќ избори пласман во четвртфиналето на Вимблдон, откако со 3-1 во сетови го совлада Австралиецот Алекс Де Минор, а триумфот на српскиот ас од трибините го проследи и неговиот голем ривал од минатото, Роџер Федерер.

По натпреварот, Ѓоковиќ се обрати пред публиката и со насмевка зборуваше за дуелот, но и за легендарниот Швајцарец кој беше присутен на трибините на „Ол Ингланд клубот“.

„Сакав да победам со 3-0, ако сме искрени. Но, натпреварите стануваат сѐ потешки. Алекс веќе подолго време е во топ 10 и е навистина тежок противник, особено на трева, па бев малку нервозен. Понекогаш посакувам да имам сервис-волеј игра како овој господин тука (Федерер), но не се жалам, можам да трчам. Како што одминуваше мечот, се подобро го наоѓав форхендот и почнав поуверено да удирам“, изјави Новак.

Србинот со доза на хумор додаде:

„Мислам дека ова е првпат Федерер да ме гледа, а да победам. Толку многу години ја делевме оваа сцена, и навистина е чест што е тука. Убаво е да се види повторно на турнирот што му донесе најмногу успеси“.

Федерер е рекордер по бројот на титули на Вимблдон со осум освоени трофеи, додека Ѓоковиќ има седум, исто како и легендарниот Пит Сампрас.