Русија ја користи онлајн платформата Ред за ширење незадоволство во германското општество како дел од кампањата за дезинформации што ја води паралелно со војната во Украина, соопшти денеска германското Министерство за надворешни работи.

„Ред се претставува како револуционерна платформа за независни новинари. Сепак, има блиски врски со руската државна мрежа RT“, изјави портпарол на Министерството за надворешни работи за новинарите во Берлин, објави Ројтерс.

Како што рече, Министерството може да потврди дека Русија ја користи платформата конкретно за манипулирање со информации.

Ред е управувана од турската медиумска компанија AFA Media, која, заедно со нејзиниот основач Хусеин Догру, веќе е предмет на санкции на ЕУ против Русија и е обвинета за „поткопување на демократскиот политички процес“ во Германија.

По воведувањето на санкциите, Ред на 16 мај објави дека ги прекинува операциите.