Германските медиуми ги повикаа политичарите да се вакцинираат против ковид-19 и со тоа да ги поттикнат граѓаните и тие да се вакцинираат, бидејќи Германците се воздржани кон вакцините. Билд пишува канцеларката Ангела Меркел да се вакцинира и со тоа да биде пример за другите, и наведува дека кај Германците постои недоверба пред сé во вакцините на АстраЗенека.

Според весникот досега се употребени само единаесет проценти од испорачаните дози на вакцини од АстраЗенека. Во покраината Баден-Виртенберг биле доставени 100.800 дози вакцини, а само 309 биле аплицирани, додека во покраината Бранденбург ниту една вакцина не е искористена.

„Она што недостасува е довербата. Потребни се примери за вакцинација, пред сé од канцеларката Меркел“, пишува Билд.

Меркел најави дека ќе се вакцинира кога ќе и дојде редот и дека од нејзиниот кабинет велат дека таа сé уште не отстапува од таа изјава, потсетува Билд. 

Заменик-шефот на парламентарната група на Партијата на слободата на Германија (ФДП), Мајкл Тојер, рече дека сигурно би било позитивен сигнал доколку Меркел и германскиот претседател Франк-Валтер Штајнмаер јавно се вакцинираат.

Билд потсетува дека американскиот претседател Џо Бајден и премиерот на Израел, Бенјамин Нетанјаху биле вакцинирани пред камерите и дека тие земји имаат далеку поголема стапка на вакцинација од Германија.

Германската Влада од крајот на декември досега вложи 25 милиони евра во кампања за вакцинација.