Третото издание на мeѓународниот фестивал „Стрип трип“ ќе се одржи од 6 до 8 јуни во Младинскиот културен центар (МКЦ) во Скопје. Главен гостин на фестивалот е Рајнхард Клајст (Германија), автор на графичките биографии за Дејвид Боуви, Ник Кејв и Џони Кеш, како и на графичките новели „Боксерот“ и „Олимписки сон“.

Меѓународни ѕвезди на фестивалот се Марко Дјешка (Хрватска), Марко Стојановиќ (Србија) и Гани Сундури (Косово), додека од македонските стрип-автори учествуваат Александар Сотировски, Смиле Цветановски, Давор Драмиќанин, Наташа Андонова, Филип Алексовски, Матеј Богдановски, Симон Калајџиев, Стефан Николовски.

На фестивалот ќе бидат доделени наградите „Македонско стрип наследство“ на Томислав Османли и на конкурсот за најдобар краток стрип.

Во програмата на фестивалот има три изложби, концерт и цртање во живо со Рајнхард Клајст и триото Стојановски-Печеновиќ-Џорлев, панели и промоции на нови стрип-изданија, цртачка „џем“ сесија со сите гости, работилница за цртање стрипови, проекција на „Јон Вардар против Галаксијата“ и кратките филмови на Марко Дјешка, поткаст во живо и други интерактивни искуства. Свои диџеј-сетови ќе имаат Шурбе и Владодлак.

На стрип-берзата учествуваат „Бункер“, „Макстрипови“, „Стрип квадрат“, „Арс ламина“, „Темплум“, „Флипбук букс“, „Артконект“, „Гаврош“, „Катран комикс“, „Парагонс комикс“, „Крипто комикс“, Жарко Миловановиќ – Жбрц.

Поддржувачи на „Стрип трип“ се Министерството за култура и туризам, Град Скопје, Општина Центар, Гете институт, „Скопско смут“, „Арс ламина“. Настанот е бесплатен и отворен за сите љубители на стрипот и графичката литература.

(Текстот е објавен во „Културен печат“ број 284, во печатеното издание на весникот „Слободен печат“ на 6-8.6.2025)