Професори од географските науки на ПМФ, наставници, нивни организации и локални здруженија со дописи до надлежните во Бирото за развој на образованието и до Министерството за образование ќе се обидат да го одбранат постоењето на предметот географија како засебен во наставната програма за шесто одделение, откако БРО најави дека од следната 2023/2024 учебна година овој предмет ќе се изучува во рамките на предметот природни науки, а во него  ќе бидат интегрирани и биологијата, физиката и хемијата.

Според наставната програма за шесто одделение во рамките на предметот природни науки ќе се изучуваат темите: својства и промени на супстанците, градба на органи и органски системи кај човекот, вселена и Сончев систем, сили и движења, електрицитет и магнетизам, како и темата грижа за животната средина. Наставата по природни науки на шестооделенците ќе им ја предаваат лица кои завршиле студии по биологија, студии по хемија, студии по физика, · студии по географија, сите во наставна насока, како и лица кои завршиле  двопредметни студии биологија-хемија, физика-хемија, математика- хемија, но и хемија-информатика, математика-физика, физика-информатика, како и лица од ненаставни насоки кои завршиле студии по биологија, хемија и физика, со стекната педагошко-психолошка и методска подготовка на акредитирана високообразовна установа.
Шестооделенците ќе имаат три часа неделно по предметот природни науки.

Вака поставената наставна програма предизвика многу реакции кај родителите кои се зачудени како наставник по физика ќе предава за човековото тело или наставник по биологија ќе предава за вселената и за Сончевиот систем.

Реакции има и кај наставниот кадар по географија, кои најавија дека ќе ги преземат сите мерки и со дописи и реакции до МОН и до БРО ќе бараат предметот да се изучува како засебен, како и да останат засебни предмети и останатите три фундаментални науки – биологијата, хемијата и физиката.

Од БРО не даваат подетаљни објаснувања во јавноста како е замислена наставата, која е дел од новата Концепција за основното образование, а нивниот одговор на оваа тема е дека часот по природни науки ќе го води еден од наставниците по интегрираните предмети.

На социјалните мрежи полека расте револтот на географите од укинувањето на предметот во шесто одделение и ова го гледаат како почеток на исчезнувањето на географијата од образованието.

– За само неколку години статусот на географијата во Македонија, како предмет, дисциплина, особено на националнта географија, падна речиси до самото дно. По „желба на структури“ во МОН, предметот географија се инкорпорира во предметот природни науки, а де факто се брише како засебна дисциплина. Состојбата е катастрофална, но сепак, разочарувачки млаки се реакциите од наставниците, кои или ќе останат без работа или со драстично намален фонд на часови, а такви, млаки, се реакциите од нивните здруженија, па и од географските високообразовни институции низ државата. Во некоја друга држава, веројатно ќе имаше секојдневни протести, реакции, барања за средби со министер, премиер и други одговорни лица. Се чини, „пандемијата“ го збриша предметот географија. Генерално, како фела, одиме во слободен пад, а падот, покрај нас самите, ни го забрза и државата. Кога ќе се свестиме, ќе биде доцна – реагира еден професор по географија на социјалните мрежи.

Географите од повеќе организации во своите дискусии најавуваат дека веќе ги подготвуваат реакциите што ќе ги испратат до надлежните, а размислуваат и за протести, петиции и други форми со кои ќе го изразат своето незадоволство. Тие сметаат дека предметот географија е најважен за личната образовна култура кај учениците.

– Географијата губи и ќе изгуби најмногу, од едноставна причина што не е типична дисциплина и комплетно од областа природни науки, па ќе остане распарчена, поделена и непрепознатлива. Треба бурна реакција на барем 50 отсто од наставниците, универзитетските професори, здруженијата на наставници и професори и др. Малку несериозно и со преголем оптимизам или рамнодушност беа прифатени најавите за овој антигеографски концепт, а последиците допрва сите ќе ги почуствуваме. Тоа особено во поглед на помладите генерации географи – пишуваат професорите.

Тие се загрижени дека без предметот географија наставниците ќе останат без часови, односно, без работа.

– Географијата не е само природна наука, туку и опшествена. И општа култура и секојдневие и сè она што не опкружува е географија, какви природни науки, какво граѓанско опшество, народ без национална географија, не е народ, пропаѓа и го нема – коментираат револтирано географите.

Тие зборуваат и дека по најавите дека ќе се укине предметот историја исотричарите со бурните и жестоки реакции успеале да си го одбранат посетоењето на предметот како засебен.

Од Македонското географско друштво веќе најавија дека во рамките на Природно-математичкиот факултет во Скопје со институтите во негов состав и соодветните струкови друштва за географија, биологија, физика и хемија се преземаат активности за запирање на реализација на концепцијата заклучно со шесто одделение, така што во продолжение наставните планови во седмо, осмо и деветто одделение би останале непроменети.

– За таа цел, деновиве ќе бидат испратени писмени реакции до надлежните државни институции, како и реализација на непосредни разговори на највисоко ниво. Се надеваме дека тие активности ќе придонесат за зачувување на статусот на наставните предмети: географија, биологија, физика и хемија – најавија оттаму.

По реакциите се огласи и МОН од каде рекоа дека „се работи за етапни фази на подготовка на програмата и дека сите предмети ќе ги има и во шесто одделение“.

– Информираме дека во финална фаза на подготовка е наставната програма со три модули, преку која ќе се изучуваат историја, географија и граѓанско образование за шесто одделение, а ќе ја реализираат наставници кои и досега ги предаваа овие предмети – е ставот на МОН.