Синот на генералот Ратко Младиќ, поранешниот командант на Главниот штаб на Армијата на Република Српска, Дарко Младиќ, денес изјави дека неговиот татко е во многу сериозна здравствена состојба, а тоа му го потврдиле здравствените работници во Хашкиот трибунал.

„Бев кај мојот татко пред еден месец. Лекарите тогаш ми кажаа дека веруваат оти тој сега е неизлечив пациент и дека му остануваат уште неколку месеци или дури недели живот. Нашите лекари го посочија овој факт пред една година. Со оваа изјава, холандските лекари на некој начин признаа дека на мојот татко не можеше да му се пружи соодветна медицинска помош во затворски услови“, изјави Младиќ за „Политика“.

Тој додаде дека лекарите во Трибуналот постојано го молеле Ратко Младиќ да изјави дека не сака да биде реанимиран во случај тоа да мора да се направи поради неговата здравствена состојба, а тој категорично одбивал секој пат кога му го поставувале тоа прашање.