Претседателката Гордана Сиљановска Давкова порача дека „Генералка викенд“ треба да има секој ден во годината, на почетокот на акцијата за чистење отпад низ државата. Тридневната акција започна од Скопскиот аквадукт, за кој претседателката рече дека треба да биде парк.

„Ако не се смириме со природата ќе се самоубиеме. Тоа е факт“, истакна Сиљановска Давкова.

Според вицепремиерот и министер за животна средина Изет Меџити, ова е најмасовна волонтерска акција за чистење на отпадот во државата која од година во година станува сè помасовна и станува симбол на тоа како свесноста за сопствената одговорност и добрата соработка дава видни резултати.

„Животната средина и особено ваквите споменици како што е Аквадуктот заслужуваат почит и грижа. Ваквите акции во кои сите заеднички покажуваме иницијатива, волја и подготвеност за соработка треба да бидат дел од нашето секојдневие. На отпадот не му е место на улица или во природата“, рече Меџити.

Еко акцијата „Генералка викенд“ е во организација на „Мен енд Маунтен“ во соработка со Пивара Скопје, Пакомак, Нула Отпад, Шпаркасе банка, ЕВН Македонија, Макстил, Бучим Боров Дол, Саубермахер и Костал. Акцијата е поддржана и од ЗЕЛС, Црвен крст и Министерство за животна средина.