Сите жители на Гази Баба можат да аплицираат за субвенции од Општината за купување нов велосипед на јавниот повик кој веќе е во тек. Средствата што Општината ќе ги надоместува се во износ од 50 одсто од вредноста на велосипедот, но не повеќе од 4.000 денари по лице, со вклучен персонален данок на доход.

Како што е наведено во повикот, пристигнатите барања ќе бидат разгледувани по редослед според датумот и времето на пристигнувањето.

Право на учество на Јавниот повик имаат жителите на општина Гази Баба, кои ќе купат нов велосипед во период од денот на објавувањето на јавниот оглас, па сѐ до 30 ноември 2025 година, поточно до исцрпување на средствата за оваа намена предвидени во општинскиот буџет за 2025 година и кои немаат искористено субвенција за купување на нов велосипед.