Општина Гази Баба објави јавен повик за субвенционирање на граѓаните за набавка на инвертер клима уреди. На граѓаните ќе им се надоместува до 50 отсто од вредноста на инвертерот.

Предмет на јавниот повик е надоместување до 50 отсто од трошоците за купување на високоефикасни инвертер клима уреди, но не повеќе од 30.000 денари. Средствата се обезбедени согласно Програмата за заштита на животната средина и природата на Општина Гази Баба за 2024 година информира, градоначалникот Бобан Стефковски.

Еден од условите за добивање субвенции наведени во огласот е дека тој што ќе добие надомест мора и да ја предаде на општината постојната печка на јаглен, дрва, нафта или мазут. Притоа, предадената печка мора да се совпаѓа со фотографијата од печката која е доставена при поднесување на барањето, во спротивно барањето ќе биде одбиено.

Јавниот повик ќе трае до 30 ноември годинава, односно сѐ до исцрпување на финансиски средства. Исплатата на одобрените средства ќе се врши по принципот „прв дојден прв услужен“.

За сите детали за условите и критериумите за аплицирање заинтересираните граѓани можат да се информираат на веб страната на Општина Гази Баба, каде што е објавен јавниот повик.