Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.

Бобе денеска споделува рецепт за вистински гурмански деликатес: велигденски козињак.

– Мирисот што ги буди сеќавањата – празнична магија од рерната на баба.
Во време кога домовите се полнат со смеа, светилки и семејна топлина, едно нешто ги спојува генерациите повеќе од било што друго – мирисот на свежо печен празничен колач. Без разлика дали го знаете како козињак, милиброт или плетенка, овој традиционален десерт го носи вкусот на спомените, љубовта и топлината што ја симболизираат празниците. Денеска ви споделувам рецепт што се подготвува четврта генерација во нашиот дом, рецепт кој премостува времиња и создава нови моменти за паметење – порачува Бобе.

Потребни состојки за тестото:

• 1 кг брашно
• 4 јајца
• 1 жолчка за премачкување
• 1 пакување свеж квасец
• 1 пакување ванилин шеќер
• 500 мл млеко
• 3 супени лажици шеќер
• Прстофат сол
• 100 г бело грозје (отстоено во рум)
• 100 г црно грозје (отстоено во ликер од вишни)
• Рендана кора од 1 портокал
• 100 г мелени ореви
• 150 г мелени бисквити
• 100 мл мелен афион
• 100 г путер

Потребни состојки за филот од афион:

• 250 мл млеко
• 500 г шеќер
• 1 пакување ванилин шеќер
• 100 г мелен афион
• 100 г црно грозје (отстоено во ликер од вишни)
• 150 г мелени бисквити
• 100 г путер

Подготовка на филот:

Во тенџере се варат млекото, шеќерот и ванилата околу 15 минути. Потоа се тргаат од оган и се додава мелениот афион и црното суво грозје, па путерот да се стопи и на крај бисквитите. Се меша се заедно и се остава филот да се излади.

Подготовка на тестото:

Замесете го брашното со стасаниот квасец (во 250 мл млеко), јајцата, шеќерот и солта. По потреба, додадете уште млеко додека не добиете меко тесто. Измесете го убаво тестото и оставете го да стаса 30 минути.

Потоа повторно размесете и додадете ја рендана кора од портокал и белото суво грозје.
Поделете го тестото на четири дела: два поголеми за тркалезна ја модла и два помали за долга модла. Покријте ги со крпа и оставете ги да стасаат уште 30 минути.

Обликување и печење:

Од секој дел расукајте долга, тесна кора. Во средина ставете од изладениот фил и затворете ја кората така што филот ќе остане внатре. Земете две теста и сплетете ги со вртење едно околу друго.

Ставете ги плетенките во подмачкани модли. Повторно оставете да стасаат 20 минути.
Премачкајте со жолчка и лажица млеко и посипете со шеќер.
Печете во загреана рерна на 200°C околу 30–40 минути.

Секое парче е приказна – споделете ја со најблиските. Исполнете го вашиот дом со мирис, вкус и спомени.

Честит Велигден!