Јованка Јанкоска Бобе, која стои зад  блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.

Бобе денеска споделува рецепт за вистински гурмански деликатес: поширани јајца.

– Во потрага по здрав, заситен и вкусен појадок или лесен оброк? Претставуваме идеја што совршено ја комбинира едноставноста на пошираното јајце со свежината на медитеранските вкусови – „Протеински рај на чинија“ – порачува Бобе.

Состојки:

• 3 свежи јајца
• 1 литар вода
• 1 лажица бел оцет
• Прстофат сол (по желба)

За сервирање:

• Парче протеински леб, благо премачкан со путер
• Свежа краставица, исечена во ленти
• Тофу сирење
• Маслиново масло
• Суви домати
• Оригано
• Печен сусам

Начин на подготовка на пошираните јајца:

Во подлабоко тенџере, загрејте ја водата сè до моментот пред да зоврие. Таа треба да биде топла со мали меурчиња, но без силно вриење. Додајте една лажица бел оцет. Оцетот ѝ помага на белката да остане компактна околу жолчката. Со лажица направете вртлог во средината на водата. Скршете го јајцето во мала чаша или сад, а потоа внимателно истурете го во центарот на вртлогот. Гответе околу 2,5 до 3 минути, додека белката не се стегне, а жолчката остане течна. Извадете го јајцето со решеткаста лажица и оставете го кратко да се исцеди на хартиена салфетка. Повторете ја постапката и за другите јајца.

Сервирање – вистинска гастрономска симфонија:

Врз протеинскиот леб премачкан со путер наредете гнездо од свежи ленти краставица. Врз нив внимателно поставете го пошираното јајце. Од страна послужете парчиња тофу сирење, прелиени со маслиново масло и зачинети со оригано. Додадете неколку суви домати за медитеранска нота. Сето тоа завршете го со прстофат печен сусам за крцкав финиш.

Здрав оброк што ја храни и душата и телото

„Протеински рај на чинија“ е совршен избор за сите што сакаат да уживаат во балансиран оброк полн со вкус и хранливи вредности. Идеален е за појадок, но и како лесна вечера.