Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.

Бобе денеска споделува рецепт за еден од омилените деликатеси – падобранци.

– Овие воздушести деликатеси се вистински хит во мојот дом и секогаш ги подготвувам со малку поинаква комбинација на филот што прави да чувствувате дека секојпат е ново искуство. Овој пат, одлучив да играм со вкусовите и да ги спојам кремастата текстура од маскарпоне и џемот од јагоди. Подготовката е лесна, а резултатот – магичен! Подгответе се за експлозија на вкусови и текстури, кои ќе ве остават без зборови – порачува Бобе.

Потребни состојки:

– 250 грама мелени ореви
– 500 грама кафеав шеќер
– 7 седум белки
– 1 лажица брашно

Фил:

– 300 грама маскарпоне
– 50 грама путер
– 150 грама шеќер во прав

Подготовка:

Мелените ореви и шеќерот треба убаво да се измешаат пред постапно да им се додадат шест белки. Се пржат на оган додека не добијат боја на мед. Се оставаат да се изладат, па им се додава последната белка и лажица брашно. Се мешаат додека не станат хомогена смеса, од која потоа се става една лажичка во плех на хартија за печење. Во плехот се редат најмногу 20 парчиња, бидејќи многу нараснуваат. Во загреана рерна на 220 степени се печат 15 минути.

Фил: Се мати омекнатиот путер и шеќерот во прав, откако ќе се сврзат, се додава и маскарпонето, се мати додека не добие свиленкаста текстура.

Изладените испечени падобранци се филуваат и се лепат меѓу себе. Со филот правев по еден прстен на еден падобранец на мазната површина што лежеа на плехот, а во средината ставив џем од јагоди, потоа го поклопив со друг падобранец.
Секое залче е нежно и полно со сатенскиот слатко-солен бел крем надополнет со ароматичниот џем од јагоди, создавајќи совршен контраст со доминантниот вкус од оревите.

На здравје сладење!