Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.

Бобе денеска споделува рецепт за вистински гурмански деликатес – лепчиња со тиква.

– Меки како памук, воздушести како перничиња, со прекрасен златен колорит од тиквата, која му дава неверојатен и фантастичен вкус на лепчето – вели Бобе.

Состојки:

– 600 грама брашно
– 10 грама свеж квасец
– лажица сол
– лажица маслиново масло
– 300 грама тиква (варена – пасирана)
– 400/500 мл вода
– 20 конци од коноп со должина од 30 см за врзување

Подготовка:

Во длабок сад се замесува многу меко тесто од сите состојки, се меша со лажица или со миксер со перките за месење тесто. Откако тестото ќе се соедини, се покрива со памучна крпа и се остава да стаса еден час. Потоа, се премесува, се покрива со растеглива фолија или се става во сад со капак и се остава цела ноќ во фрижидер да стасува полека. Наредниот ден, тестото се вади од фрижидер и од него се формираат пет еднакви топчиња. Тестотот е лепливо и меко, треба да се работи брзо и на набрашнета површина.

На работната маса се ставаат исечени по четири конци од коноп еден врз друг, врз конците се става топче тесто, па се врзуваат сите конци во средина на тестото. Потоа, се ставаат во тава обложена со хартија за печење, се покриваат со памучна крпа и се оставаат 15 минути да стасаат, па се ставаат да се печат во загреана рерна на 220 степени, 20 минути.

Штом ќе се извадат од рерна, се вадат од тавата и се обвиткуваат во памучната крпа, па се ставаат на решетка да се изладат, за долната страна да не им се навлажни. Конците се вадат кога ќе се изладат лепчињата.

На здравје!