Гастрономско уживање од Дијана Иваноска: Тарт со крем од бадем и поширани круши
Животот навистина може да биде беспрекорно „вкусен“, а тоа го потврдува и Дијана Иваноска од Тетово, која со својот талент за комбинација на вкусови нè носи на едно исклучително гастрономско патување.
Препорачано
Иваноска стои зад инстаграм-профилот „Dash of Spice“ и ни ги открива малите тајни за создавање магија од вкусови.
Инвентивната Дијана денеска споделува рецепт за едно вистинско гастрономско уживање – тарт со крем од бадем и поширани круши.
За кората:
– 240 грама брашно
– 70 грама шеќер во прав
– 1/4 лажиче сол
– 1 лажиче рендана кора од лимон
– 155 грама путер ладен и исечкан на коцки
– 1 лажиче екстракт од ванила
– 1 жолчка
За поширање на крушите:
– 3 помали круши
– 1 литар вода
– 300 грама шеќер
– 2 стапчиња цимет
– 1 ѕвездест анис
– 2 парчиња кора од лимон (без белиот дел)
За кремот од бадем (франџипане):
– 115 грама путер
– 115 грама шеќер во прав
– 115 грама брашно од бадеми
– 3 јајца
– 1 лажица брашно
Подготовка:
За подготовка на кората измешајте ги брашното, шеќерот, солта и кората од лимон. Тријте го ладниот путер во брашното додека добиете ронлива смеса. Додајте ги жолчката и ванилата и замесете тесто. Завиткајте го во проѕирна фолија и оставете го да се лади минимум еден час.
Расукајте го тестото меѓу две парчиња хартија за печење. Нанесете го на дното и краевите на тавче за тарт со пречник од 25 см. Вратете го во фрижидер додека се загрева рерната на 190 степени.
Ставете парче фолија над тестото и над него ориз или грав за да се спречи надигнување на тестото додека се пече. Печете 20 минути, отстранете ја тежината и печете уште 10 минути.
Оставете го да се излади на собна температура.
Поширање на крушите:
Сипете ги во тенџере водата и шеќерот. Кога ќе се стопи шеќерот и ќе почне да врие смесата, додајте ги зачините и намалете ја температурата. Излупете ги крушите, исечете ги на половина и отстранете ги семките. Ставете ги во водата што врие и нека се варат на тивко околу 10 минути.
За кремот од бадем, изматете го убаво путерот и шеќерот. Додавајте ги наизменично брашното од бадем и јајцата и матете. На крај, додајте го брашното и изматете сѐ да се спои убаво.
На кората нанесете го кремот. Изладените круши исечкајте ги и наредете врз кремот.
Печете 40-50 минути на 190 степени Целзиусови.
Наросете со шеќер во прав.
Уживајте!
