Дијана Иваноска стои зад инстаграм-профилот „Dash of Spice“ и ни ги открива малите тајни за создавање магија од вкусови. Своите рецепти почнала да ги споделува со своите следбеници и пријатели од почетокот на пандемијата.

Инвентивната Дијана денеска споделува рецепт за едно вистинско гастрономско уживање – сочно тирамису.

– Она што ми се допаѓа кај овој рецепт е што не содржи „живи“ жолчки и што нема желатин, а сепак, држи форма и може да се сече за сервирање. Навистина е лесно да се направи и е толку вкусен. Ја сакам комбинацијата на рум и кафе заедно – порачува Дијана.

Состојки:

– 400 грама пишкоти
– 6 жолчки
– 150 грама шеќер
– 160 мл млеко
– 450 грама маскарпоне
– 300 мл слатка павлака
– 400 мл кафе
– 4 лажици рум
– какао во прав за посипување

Подготовка:

1. Во 400 мл врела вода растворете 4 лажички инстант кафе. Оставете го целосно да се излади.
2. Во тенџерче измешајте ги жолчките со шеќерот и полека мешајќи, додајте го млекото.
3. Загревајте ја смесата, мешајќи цело време и откако ќе зоврие варете на тивко околу две минути. Овој чекор ќе го згусне малку кремот и ќе ги пастеризира жолчките. Покријте го кремот со проѕирна фолија и оставете го да се излади.
4. Убаво изматете ја слатката павлака.
5. Во ладниот крем од жолчки изматете го маскарпонето. Додадете ја и слатката павлака и матете додека не добиете мазен крем.
6. Во кафето ставете го румот.
7. Потопувајте ги кратко пишкотите во кафето и наредете ги во тавче.
8. Нанесете половина од кремот врз пишкотите. Повторете со уште еден ред пишкоти и крем.
9. Покријте со фолија и оставете го во фрижидер преку ноќ.
10. Посипете со какао во прав пред послужување.

Уживајте!