Животот навистина може да биде беспрекорно „вкусен“, а тоа го потврдува и Дијана Иваноска од Тетово, која со својот талент за комбинација на вкусови нè носи на едно исклучително гастрономско патување.

Иваноска стои зад инстаграм-профилот „Dash of Spice“ и ни ги открива малите тајни за создавање магија од вкусови.

Инвентивната Дијана денеска споделува рецепт за едно вистинско гастрономско уживање – поширани круши со маскарпоне крем.

Состојки:

– 4 круши
– 1.200 мл вода
– 300 грама шеќер
– 1 ѕвездест анис
– 2 стапчиња цимет
– 2 парчиња кора од лимон без белиот дел
– 1 лажиче ванила екстракт

За кремот:

– 200 грaма маскарпоне
– 200 мл слатка павлака
– 1 лажица шеќер во прав
– 50 мл од сокот во кој се вареа крушите

Карамелизирани ореви за гарнир:

– 100 грама ореви
– 2 лажици шеќер

За подготовка на крушите:

1. Ставете ги водата и шеќерот во подлабоко тенџере. Загревајте додека почне да врие. Кога ќе се растопи шеќерот, додајте ги зачините. Намалете ја температурата и оставете да врие на тивко додека ги подготвите крушите.
2. Излупете ги крушите, исечете ги на половина и отстранете ги семките.
Потопете ги во течноста. Врз нив ставете парче хартија за печење исечена во големина на тенџерето. Хартијата треба да ги допира крушите.
3. Оставете ги да вријат 15-20 минути во зависност од тоа колку се меки крушите. Боцнете ги со нож, треба да се меки, но сепак да ја задржат формата.
4. Оставете ги да се изладат на собна температура во течноста.
Може да се стават во фрижидер преку ноќ за да ги впијат убаво зачините.
5. Изматете го маскарпонето со шеќерот и 50 мл од течноста во која се вареле крушите.
6. Во друг сад изматете ја слатката павлака и соединете ги двете смеси додека се изедначат. Ставете го кремот во фрижидер до послужување.
7. Загревајте го шеќерот додека добие карамел боја. Додајте ги оревите и измешајте да се обложат со стопениот шеќер.
8. Кога ќе се изладат, исечкајте ги.

На чинија ставете од кремот.
Врз кремот ставете од крушите.
Додајте од оревите и од течноста во која се вареле крушите.