Животот навистина може да биде беспрекорно „вкусен“, а тоа го потврдува и Дијана Иваноска од Тетово, која со својот талент за комбинација на вкусови нè носи на едно исклучително гастрономско патување.

Иваноска стои зад инстаграм-профилот „Dash of Spice“ и ни ги открива малите тајни за создавање магија од вкусови. Своите рецепти почнала да ги споделува со своите следбеници и пријатели од почетокот на пандемијата.

„Го сакам секој дел од процесот, но најмногу уживам во фотографирањето на храната“, ни открива Дијана.

Дијана денеска со нас споделува рецепт за крем-супа од брокула и карфиол.

„Има ли поубаво од топла, кремаста супа на студено време? Оваа супа е едноставна и лесна и се прави буквално за 20 минути. Згора на тоа е и веган варијанта на крем-супа. На фотографиите има малку неутрална павлака за декорација (опционално), но самиот рецепт е посен“, објаснува Дијана.

Состојки:

– 1 лажица маслиново масло
– 1 главица кромид
– 2 чешниња лук
– 1 морков
– 250 г брокула
– 400 г карфиол
– 120 г компир
– Зеленчукова коцка за супа
– 800-900 мл вода
– Сол
– Бибер
– Магдонос
– Зачини по желба

Подготовка:

Исечкајте го зеленчукот. На лажица маслиново масло пропржете ги кромидот, лукот и морковот. Додајте ги компирот, карфиолот и брокулата и пржете уште малку.
Растворете ја коцката за супа во водата и додајте ја на зеленчукот.

Намалете ја температурата, поклопете со капак и оставете да се крчка околу 20 минути или додека омекне зеленчукот. Префрлете во блендер или испасирајте ја супата со рачен блендер.

Вратете ја на оган уште кратко. Пробајте ја и зачинете со бибер или со друг зачин по желба. Сол не треба да се додава бидејќи е солена коцката за супа.

Декорирајте со малку маслиново или со неутрална павлака. Сама по себе е посна. Може да ставите и семки од тиква, сончоглед или брускети за крцкавост. Уживајте!