Дијана Иваноска со својот талент за комбинација на вкусови нè носи на едно исклучително гастрономско патување. Иваноска стои зад инстаграм-профилот „Dash of Spice“ и ни ги открива малите тајни за создавање магија од вкусови.

Инвентивната Дијана денеска споделува рецепт за едно гастрономско уживање – колачи со лаванда и лимон.

– Не можам да ви опишам колку добро оди комбинацијата лаванда и лимон. Меки, миризливи колачиња, кои се подготвуваат ептен брзо. Тестото не се лади во фрижидер, веднаш се расукува кората и се вадат колачи. Многу добро држат форма додека се печат, идеални се ако сакате одреден облик – порачува Дијана.

Состојки:

– 115 г путер на собна температура
– 100 г шеќер
– 1/2 јајце (Правев половина доза, затоа половина јајце. Од цела доза излегуваат 36 до 40 колачиња, во зависност од големината. За да издвоите половина јајце, изматете го со виљушка и отстранете пола.)
– 1 лажиче ванила екстракт
– 1 лажиче сува лаванда
– кора од еден лимон
– 210 г брашно
– 1/2 лажиче прашок за печиво
– 1/4 лажиче сол

За преливот (отприлика):

– 100 г бела чоколада
– 1 лажица кокосово масло
– сува лаванда за посипување

Подготовка:

* Загрејте ја рерната на 175 степени Целзиусови.
* Изматете го пенесто путерот со шеќерот. Додајте го јајцето и ванилата и матете уште кратко.
* Измешајте ги сувите состојки, брашното, солта, лавандата и кората од лимон.
*Спојте ги сувите и влажните состојки и мешајте додека добиете тесто. Стиснете со рака, ако ја задржува формата, готово е.
* На набрашнета работна површина, развлечете го тестото и вадете колачи со чаша или калап за колачи. Остатокот од тестото спојте го и вадете колачи додека не го употребите целото тесто.
* Наредете ги на тавче обложено со хартија за печење.
* Печете 8 до 10 минути или додека благо поруменат краевите на колачите.
*Растопете ја чоколадата со кокосовото масло. Потопувајте ги колачите до пола во чоколада и одозгора наросете уште малку сува лаванда.
*Оставете ги да се стегне чоколадата.
Уживајте во секое залче.