Последниот вербален инцидент во Собранието на кој пцости разменија Димитар Апасиев од Левица и пратеници од ВМРО-ДПМНЕ и кој за малку ќе прераснеше во тепачка, го испровоцира претседателот на Парламентот Африм Гаши да најави измени или нов етички кодекс за пратениците. Тој на брифинг со новинарите рече дека е неопходен нов кодекс за да се подигне угледот на Парламентот и како што вели за него е неприфатливо такво недолично однесување зашто тој во животот не опсул и не сака гражаните така да го перцепираат.

-Се согласувам дека треба нов Етички кодекс на Собранието за да ги зајакнеме укажувањата и кога ќе се констатира дека некој го прекршил да има поголеми последици. Во фаза сме да имаме компаративна анализа од другите собранија како тоа е уредено за да видиме кој меѓу етичките кодекси е најсоодветен за нашите прилики. Јас сум многу посветен на тоа да го подигнеме кредибилитетот и достоинството на Собранието. Секој пратеник во моментот кога ќе стапне на говорницата како ќе настапи, јас можам да го прекинам, да го опоменам, но сепак останува на совеста на пратениците. Жалам што има такви сцени во Собранието. Јас се чувствувам лошо и непријатно во тоа и не би сакал да се повторуваат таквите сцени – вели Гаши.

За инцидентот меѓу пратеници на Левица и на ВМРО-ДПМНЕ, претседателот на Собранието вели дека веднаш дал пауза и лично отишол да ги смири. Тој е благодарен дека пратениците го послушале.

– Јас дадов пауза и лично отидов кај пратениците од Левица и од ВМРО-ДПМНЕ и за пет минути ја смиривме ситуацијата. Навистина сум им благодарен на пратениците што ме послушаа, но за угледот на Собранието тоа е голема катастрофа. Јас многу жалам што сè уште може да се слушне таков тон во Собранието, а тоа е моделот кој ние го покажуваме пред граѓаните, без разлика кој е пратеникот ли пратеничката група. Граѓаните нас не нè делат, туку велат пратениците, Собранието. Тоа значи, ме вклучуваат и мене, а јас не сакам ниту еден граѓанин мене да ме перцепира како човек кој се однесува така. Јас никогаш во животот никого и никогаш не сум пцуел. За мене е неразбирливо во Собранието, во пленарната сала да има таков однос – рече Гаши.

Тој појасни дека досега ниту еден пратеник не го пријавил инцидентот за Комисијата за деловнички прашања да може да заседава.

-Треба некој да го пријави настанот за да може Комисијата на седница да констатира дали имало прекршување на Етичкиот кодекс. Пријава засега нема, но знам дека се зборува меѓу пратениците да има некаква постапка за тој инцидент. Според мене, во Кодексот јасно и децидно се кажува што значи мало и големо прекршување и повреда на Кодексот. Според мене, имаше тешка повреда на Етичкиот кодекс, но тоа треба да се констатира на Комисија- вели Гаши.

На прашање зошто тој не пријави, претседателот вели дека тој повеќе се гледа себе како човек кој зближува и дека сака да останам неутрален.