Доколку Бриселскиот договор не се спроведе оваа година – поврзувајќи ја политичката автономија на косовските Срби и нормализацијата на односите меѓу Србија и Косово – ризикот од неизбежен конфликт е реален, а доколку тоа се случи, последиците би биле сериозни, пишува британски Гардијан.

Во написот во кој се анализира ситуацијата на Западен Балкан, под наслов „Европа треба да направи повеќе“, Гардијан наведува дека во декември „локалните спорови“ доведоа до поставување барикади на северот на Косово, кој главно е населен со Срби.

„Односите меѓу Приштина и Белград – кој ја ужива ентузијастичката поддршка на Кремљ и одбива да ја признае независноста на Косово – изгледаат полоши од кога било во последните 20 години“, наведува Гардијан.

Се посочува и дека капацитетот на Европската унија да посредува е „комплициран“, поради зависноста на Србија од рускиот гас, но и одбивањето на Белград да воведе санкции кон Москва.