Десетици илјади луѓе од цела Србија се собраа на антикорупциски протест во Белград, што се смета за кулминација на повеќемесечните демонстрации што го разнишаа владеењето на автократскиот претседател Александар Вучиќ.

Звуците на свирежи и вувузели одекнаа низ српската престолнина, која е под силни безбедносни мерки откако беше најавен собирот. Некои демонстранти носеа транспаренти на кои пишуваше „Готово е!“, додека други скандираа „Пумпај!“, слоган што стана воспоставен за време на четиримесечните студентски протести.

Овој антирежимски протест најверојатно ќе биде најголемиот досега одржан во Србија, пишува Гардијан.

Еден од демонстрантите, Миленко Ковачевиќ, рече: „Очекувам дека ова ќе го разниша неговиот авторитет и дека Вучиќ ќе сфати дека народот му го свртел грбот“.

Полицијата соопшти дека уапсила маж кој со автомобил влетал во демонстранти во една белградска населба, при што повредила три лица.

Тензиите се зголемија пред протестот, откако приврзаниците на Вучиќ поставија камп во паркот пред Претседателството. Вучиќ претходно оваа недела се закани дека безбедносните сили ќе употребат сила против насобраните демонстранти.

Јавниот превоз во Белград беше суспендиран во очигледен обид да ги спречи луѓето да пристигнуваат на протестот, бидејќи огромни колони автомобили влегоа во главниот град. Транспортната компанија соопшти дека одлуката е донесена „од безбедносни причини“.

Властите се соочуваат со речиси секојдневни протести од ноември минатата година, кога се урна покривот на железничката станица во Нови Сад, при што загинаа 15 лица. Многумина ја обвинија широката корупција за несреќата, бидејќи станицата беше претходно реновирана и отворена во 2022 година, со присуство на Вучиќ.

Иако протестното движење е главно мирно и нема формално лидерство, Вучиќ тврди дека демонстрантите „се обидуваат да постигнат нешто со насилство, но тоа ќе им биде крајот“ и дека „многумина ќе завршат зад решетки“ по протестот.