Пожарникарите вчера едвај го изгаснаа пожарот што несовесни граѓани го подметнаа пред седум дена на депонијата Буково, каде се исфрла комуналниот отпад од градот Охрид. Огнот го гаснеле пожарникари од Охрид и Ресен и екипи на охридското кумунално претпријатие со сета расположлива опрема и механизација, со дронови, со земја, а гаснеле и со алги.

Заради оваа огромна опасна нестандардна депонија која е сместена среде шума на границата на општините Охрид и Ресен, цело лето и жителите и туристите во Охрид и Ресен се задушуваат во отровен чад.

Од Јавното претпријатие „Охридски комуналец“ известија дека на 29 јули (сабота) во попладневните часови непознато лице подметнало пожар на депонијата Буково, а после два дена повторно некој подметнал пожар, на спротивната страна на депонијата.

– Екипите на „Охридски комуналец” во саботата веднаш излегоа на терен и ги превзедоа сите неопходни мерки за локализирање и гаснење на пожарот и за нормализирање на состојбата во соработка со екипите на протипожарните единици од Охрид и Ресен. Истиот ден пожарот беше стабилизиран и изолиран. На 31 јули исто така беше подметнат друг пожар на сосема друга страна од депонијата. И за двата случаи беше поднесена пријава до СВР Охрид од наша страна за подметнат пожар од непознат сторител – информираат од „Охридски комуналец“

Оттаму додаваат дека нивните екипи се на терен и депонијата е под секојдневен мониторинг. Деновиве со специјална механизација опожарениот дел од депонијата се покрива со големи количини земја.

Од Државен инспекторат за животна средина вчера известија дека овластениот општински инспектор за животна средина од Охрид извршил вонреден инспекциски надзор во нестандардната комунална депонија Буково.

– Службите на ЈП „Охридски комуналец“ го санираат опожарениот дел, а во неколку наврати интервенирала и Противпожарната единица на градовите Охрид и Ресен. Депонијата со механизација се затрупува со земја и се гаси и со беспилотно летало дрон со течна алга. До опожарување е дојдено поради излегувањето на метанскиот гас и намерно потпалување од непознати лица за кои е поднесена соодветна пријава до СВР Охрид од страна на „Охридски комуналец“ – соопшти Државниот инспекторат за животна средина.

Оттаму додаваат дека состојбата се следи интензивно на терен од страна на инспекциската служба и дека е укажано да се вклучат сите расположиви човечки капацитети и механизација за да се санира состојбата, за да се спречи понатамошното загадување на воздухот и животната средина и да се зашти здравјето на луѓето.

Граѓаните од Охрид и од Ресен на социјалните мрежи јавуваат дека состојбата е алармантна и дека воздухот мириса неподносливо.

Загадувањето од пожарот го регистрираше мерната станица за квалитет на воздухот на Државниот автоматски мониторинг. Во последниве пет дена среднодневната концентрација на прав е во постојано искачување. Не е познато колкава количина на други токсични гасови, како диоксини и фурани, се испуштени за време на пожарот.
Оваа депонија е една од оние за кои уште пред две децении беше најавено дека итно треба да се затворат затоа што ја загадуваат околината, а просторот да се санира, но од итноста со години нема ништо.