Заедничкиот проект „Граници“ на авторките Дита Старова Ќерими и Шќипе Мехмети од 15 до 25 декември е поставен во галеријата „Ко-Ра“ во ЈУ Дом на култура „Кочо Рацин“ во Скопје. Историчарот на уметност Емил Алексиев за проектот на двете уметници напиша: „Уметноста е можна поради тоа што уметникот се осмелува да ги пречекори границите. Тој заминува на неизвесно патување во непознатото, зад границата на она што е видливо и познато. Храброста на уметникот да ги пречекори границите создава можност да се создаде уметничко дело. Овој проект е токму таков чин на храброст каде ликовните уметници Шќипе Мехмети и Дита Старова Ќерими се обидуваат да ги пречекорат границите на познатото во своите дела и да се упатат кон некои нови и непознати предели на уметноста“.

(Текстот е објавен во „Културен печат“ број 61, во печатеното издание на „Слободен печат“ на 19-20 декември 2020)