Уругвајскиот фудбалер Родриго Бентанкур е казнет од Англиската асоцијација со седум натпревари и 100.000 англиски фунти поради расистичка изјава.

Бентанкур, играчот на Тотенхем, упати навреда на адреса на неговиот клупски колега, Јужнокореецот Хеунг-Мин Сон за време на интервју за една уругвајска телевизија во јуни.

– Дрес на Сон? Може да биде и дресот на неговиот братучед, бидејќи сите тие изгледаат исто – кажа Бентанкур, но брзо се извини за таквите зборови, нагласувајќи дека се испаднало како многу лоша шега.

После тоа, Сон за англиските медиуми истакна дека меѓу него и Бентанкур нема никакви проблеми и дека имаат добри односи како и досега.

Сепак, поради расни навреди, Англиската фудбалска асоцијација (ФА) покрена постапка против Уругваецот и сега заедно со паричната казна, тој е суспендиран на седум натпревари во Англија. ФА додаде дека уругвајскиот фудбалер „сериозно го прекршил правилото на однесување на фудбалерите“.

Во текот на 2022 година, 27-годишниот Бентанкур дојде во Тотенхем од Јувентус.