Францускиот актер Ален Делон, кој почина вчера на 88-годишна возраст, ќе биде погребан на неговиот имот во Души, кој се наоѓа на околу 120 километри јужно од Париз, објави денеска француската онлајн телевизија БФМТВ.

По сопствена желба, Делон ќе биде погребан во Души, а кон средината на неделата ќе се одржи скромна церемонија во капелата на имотот во чија близина се гробовите на неговите миленици – германски овчари.

Актерот претходно изјави дека не сака оддавање национални почести и да добие национална комеморација, туку скромно да биде погребан во присуство на најблиските членови на семејството и во близина на кучињата.

Сепак ќе се одржи неофицијална церемонија во присуство на филмски уметници, но подоцна, во септември, во Париз.