Француската Социјалистичка партија и крајно-левичарската партија денеска начелно се согласија да учествуваат заедно на парламентарните избори во јуни и да се обидат да му го одземат мнозинството на новоизбраниот претседател Емануел Макрон.

Доколку биде потврден, коалицискиот пакт, кој Зелените и комунистите го одобрија претходно оваа недела, ќе биде првпат француската левица да се обедини по 20 години – но овојпат под кормилото на евроскептичната, левичарска ЛФИ.

„Сакаме да имаме пратеници во мнозинството изборни единици, за да го спречиме Емануел Макрон да продолжи со својата нефер и брутална политика и да ја победиме екстремната десница“, се вели во заедничката изјава на социјалистите и ЛФИ по неколкудневните тешки разговори.

Договорот се оформи под водство на лидерот на крајната левица, Жан-Лук Меланшон, кој помина многу подобро од болната Социјалистичка партија (ПС) на претседателските избори минатиот месец.

Меланшон се отцепи од ПС во 2008 година, откако не успеа да го разводни својот про-европски став, а тоа беше очигледно во денешниот договор, во кој поранешната проевропска ПС се согласи да „не ги почитува“ или барем „привремено да отстапи“ од правилата на ЕУ за голем број економски, социјални и буџетски политики.

Во изјавата, која сепак требаше да биде одобрена од националниот комитет на ПС на состанокот во четвртокот навечер, се вели дека двете партии сакаат ЕУ да биде повеќе фокусирана на социјалните права и заштитата на животната средина.

Политиките на новата левичарска алијанса, исто така, вклучуваат планови за намалување на старосната граница за пензионирање од 62 на 60 години, зголемување на минималната плата и ограничување на цените на основните производи.

Макрон го освои вториот претседателски мандат минатиот месец, но ќе му треба мнозинство и во парламентот за да ја поттикне својата про-деловна политика, вклучително и зголемувањето на старосната граница за пензионирање на 65 години.

Церемонијата на положување заклетва за неговиот втор мандат ќе се одржи во сабота, додека некои од кандидатите на неговиот про-ЕУ табор за изборите во јуни треба да бидат познати подоцна оваа недела.

Доколку ПС во четврток го потврди, успехот на Меланшон во постигнатиот договор со партијата која долго време беше доминантна сила на француската левица, ќе означи огромен пресврт на настаните во политиката во Франција.

ПС и даде на Франција двајца претседатели од Втората светска војна и беше движечка сила за европската интеграција.

Но, социјалистите имаа мала моќ во изборите. Нивниот претседателски кандидат, градоначалничката на Париз, Ан Идалго, собра оскудни 1,75 отсто од гласовите на гласањето минатиот месец, додека Меланшон беше трет со 22 отсто.

Поранешните социјалисти се обидуваат да го блокираат договорот

Социјалистичките ветерани, вклучително и поранешниот лидер на партијата Жан-Кристоф Камбаделис, веќе ги повикаа колегите да го блокираат договорот, велејќи дека тоа би можело да го означи крајот на про-ЕУ силите на левицата.

Корин Нарасигуин, висок партиски лидер, рече дека договорот – според кој само еден пратеник од секоја партија што ќе се приклучи на алијансата ќе се кандидира во која било изборна единица – предвидува дека ПС ќе има само 70 кандидати во континентална Франција.

Францускиот долен дом има 577 пратеници.