Француски „Декатлон“ обвинет за профит од принудна работа во Кина
Француската компанија за спортска облека „Декатлон“ е обвинета од медиумите дека користела компанија поврзана со принудна работа на Ујгурите како снабдувач во Кина, факт што компанијата го негира, и дека набавува памук од провинцијата Ксинџијанг.
Препорачано
„Декатлон“ е обвинет од страна на информативната веб-страница „Disclose“ и телевизиската емисија „Cash Investigation“ за набавка на ткаенини од групата Кингдао Џифа, „која се потпира на мрежа на принудна работа во Кина“.
Во документарниот филм „Cash Investigation“, локален извршен директор вели дека памукот складиран во компанија што произведува стока за „Декатлон“ најверојатно доаѓа од провинцијата Ксинџијанг, која е населена со Ујгури.
Компанијата потврди дека набавува суровини од Кингдао Џифа, но за АФП изјави: „Ние категорично ја осудуваме секоја форма на принудна работа. Посветени сме на поддржување на интегритетот и почитување на основните права во нашето работење и синџир на вредности и нема да се двоумиме да реагираме и да ги преземеме неопходните мерки доколку таквите факти се докажат“.
Компанијата наведува дека „100% од памукот што го користи „Декатлон“ за производство на своите производи доаѓа од извори посветени на одговорни практики, што гарантира отсуство на каква било форма на принудна работа и вклучува органски и рециклиран памук.
Кина започна масовна „контратерористичка“ кампања за потиснување на ујгурското малцинство во Ксинџијанг по бранот бомбашки напади во минатото, а според невладините организации и западните истражувања, Ујгурите се жртви на принудна работа.
Емисијата „Cash Investigation“ се однесува конкретно на производи со лого на американската НБА, чиј партнер е „Декатлон“ од 2021 година. Компанијата рекламира дека има можност да продава производи со НБА бои или со НБА франшиза во повеќе од 1.700 продавници на „Декатлон“ ширум светот или онлајн во Африка, Источна Азија и Латинска Америка, Европа.
Во Соединетите Држави, законот усвоен од Конгресот во декември 2021 година забранува секаков увоз на производи со потекло од Ксинџијанг, освен ако бизнисите во регионот не можат да докажат дека нивното производство не вклучува принудна работа.
